சுகமான சுமை

குழந்தை மட்டுமல்ல

பெற்றோரும் தான்

வயதானதால் அல்ல

வலியால்

பக்குவப்பட்டேன்

வாட்டியது வாடைமட்டுமல்ல
விடுமுறையின் வரவும் தான்

வீட்டுக்குள் மழை

கப்பல் விடுவதா

கவலைப் படுவதா

வீட்டுக்குள் மழை
கப்பல் விடுவதா
கவலைப் படுவதா

கணினி,
இணையம்,
இளைய தலைமுறை
சந்தோஷங்கள் என்று நினைப்பதுண்டு...

இன்றோ
வெளிநாட்டில் மகன்
கணினியும்,
இணையமும்,
அவனிடத்து என்னை
நாளும் கூட்டி செல்கின்றன,

இன்று நினைக்கிறேன்,
கணினி,
இணையம்,
மூத்த தலைமுறையின்
சந்தோஷம் மட்டுமல்ல,
உயிர் மூச்சும் கூட...

மாமியார் மருமகள் உறவு...

உறவு பகையன்று

உணர்வு பகையே...

' மாமியார் '
சொல்லை அகராதியிலிருந்து
எடுக்க விரும்புகிறேன்
நீ
அடிக்கொடல்லவா இடுகிறாய்..

மருமகளே
உனக்கும்
எனக்குமான
இடைவெளி
இன்று நேற்றல்ல
யுகமாய் தொடர்கிறது
இரட்டு நிரப்ப நான் தயார்,
நீ...?

பெண்ணே,
புரிந்துகொள்!
என் மகன்தான்
உன் கணவன்,
நீ நினைப்பது போல்
உன் கணவன்
என் மகன் அல்ல...

விலை பேசியது உங்களை மட்டும்தானா..?

ஐஸ்வர்யா ராய்,
சுஷ்மிதா சென்,
டயானா ஹய்டன்,
லாரா தத்தா ,
பிரியங்கா சோப்ரா ,

உலக அழகிகளே .....!
பிரபஞ்ச நாயகிகளே.... !

உங்களுக்கு சூட்டப்பட்டது
வெற்றி கிரீடங்கள் அல்ல...
பெண் இனத்தின் மீது
சூட்டப்பட்ட முள் கிரீடங்கள்...

ஆணாதிக்க கழுகுகளின்
ச(ந்)தை பசிக்கு
இரையாகிப்போன
அழகிகளே...!

நீங்கள் மகுடம் சூடியது
சரித்திரமும் அல்ல ,
சாதனையும் அல்ல...

விளம்பரக் கலாசாரத்துள்
உணர்வு மக்கி,
அறிவு அழிந்து ,
வீணாகி போக ,
எதிர்காலத்தை விலை பேசி விட்டீர்களே...

நீங்கள் - விலை பேசியது
உங்களை மட்டும் அல்ல,
பெண் இனத்தின்
எதிர்காலத்தையும் சேர்த்துதான்...